Enxeñeria Sen Fronteiras

Rematou a 1ª Escola de Verán de ESF sobre tecnoloxías libres

/in , , ,

A pasada semana tivemos a 1ª Escola de Verán de ESF sobre tecnoloxías libres dixitais (e algunha analóxica tamén), na Escola de Enxeñaría de Camiños, Canais e Portos, que nos cedeu un espazo moi axeitado.

Puidemos celebrala grazas á participación de 7 formadores (Sebas, Pepe, Jorge, Sergio, Manuel, Alejandro e Xavier), apoiados por compas de Bricolabs, que nos compartiron a súa sabedoría, e con cofinanciación de Cooperación Galega e fondos IRPF (a casiña solidaria da declaración da renda) da Xunta de Galicia.

Aquí se pode ver o programa. Foron 13 obradoiros, 3 cada día excepto o venres que foi un de 6 horas (dividido en dúas partes, montaxe e programación dun robot Sapoconcho XL). Os temas foron Blender
Libreoffice, GIMP. Docker. Emacs. FreeCAD, fotografía con Darktable. LoRa e Radioafición. accesibilidade dixital en deseño web, openstreetmap e robot sapoconcho.

Na táboa seguinte vese as persoas asistentes a cada obradoiro, 132 en total (aínda que moitas repetiron varias veces). Chama a atención como o máis demandado foi o de Radio Afición (que ten bastante comunidade en Galicia, e seguro que o Apagón tamén algo influiu…). Tamén o de FreeCAD tivo case cheo.

Deixouse xa parte do material neste repositorio. Algúns destes obradoiros seguro que se repiten ao longo do vindeiro curso. Ademais, esperamos seguir repetindo esta Escola de Verán.

Para seguir afondando na tecnoloxía libre e a autodefensa dixital non deixes de botarlle un ollo á nosa Guía de Autodefensa Dixital.

Blender con Sebastián
GIMP con Pepe
Anteas para LORA
Radioafición
Robot Sapoconcho XL con Salvari

Foto portada, Darktable con Jorge

Enxeñeria Sen Fronteiras

ESF no Encontro de profesionais pola defensa do territorio. Queremos un territorio para coidar a vida

/in , , ,

Onte tivemos representación ESFeira no encontro de profesionais pola defensa do territorio, neste caso sobre todo contra a implantación de Altri na Ulloa, cunha andaina entre Casanova e Leboreiro. Despois distintas voces e distintas sensibilidades falaron e acabouse lendo un manifesto.

Miguel falounos do patrimonio paisaxístico, cultural e sentimental de Leboreiro, ao lado da “Zona 0”.

Socorro, a mestra, defende que non pode haber axeitado estudo de impacto ambiental sen ter en conta ás crianzas e outros grupos vulnerables. Non a colonización deste territorio!

Dende a plataforma de Defensa ria Pontevedra se vincula a loita ence e altri: NIN ALTRI NA ULLOA NIN ENCE NA RÍA!

Pilar, labrega ecolóxica de Vila de Cruces traenos o medo á contaminación.

Lois, gandeiro, di que gandeiría é máis que producir alimento, é modelado da paisaxe e protección ambiental.

Dende o traballo social dise que todas somos axentes de cambio ecosocial na comunidade.

María ,enxeñeira naval de Antas de Ulla lembra “o progreso” que chega a súa aldea cando a concentración parcelaria arrasarou valados e carballeiras e non recoñecía a súa aldea. Agira vive nunha aldea que está só na súa memoria e lle da tristeza.

Ana Pernas, avogada, lembra a recente condea á Xunta por deixadez coa contaminación do Limia e non defender o ben común. Van promover a personalidade xurídica do río Ulla.

Concha Casares do grupo vivo Melide , ten negocio de hostelería no Camiño e defende o patrimonio, que é noso.

Galizaltri e altrilicto non é para nós. Haberá que elixir que modelo territorial e produtivo queremos e que terra lle deixaremos a quen vén detrás.

Xenial coma sempre, con retranca e lucidez, Quico Cadaval facendo de mestre de cerimonias, nunha sorte de eucaristía pola terra e o territorio

Puidemos participar neste encontro grazas ao programa de ESF no eido profesional (ESFpro).

BOE
Enxeñeria Sen Fronteiras

Boletín Oficial ESFeiro. Xullo 2025

/in , , ,

CONTIDOS

  • Vida Asociativa
  • Honduras
  • Mozambique
  • Enlaces de interese
  • Recomendación artística
  • E no próximo mes …
  • A ESFrase do mes

VIDA ASOCIATIVA

    En Galicia tivemos un xuño de actividade intensa, a pesar de ser fin de curso. Empezamos a presentación da nosa Guía de Autodefensa Dixital, feita colaborativamente e  que está en constante actualización. 

    No programa Hackers Sen Fronteiras de tecnoloxía para o ben común no ensino secundario, pódense escoitar xa os programas de radio realizados por alumnado do IES San Rosendo de Mondoñedo, na súa visita a nosa sede na Escola de Camiños. Ademais, podemos ver o avance da iniciativa gañadora do concurso Hackers Sen Fronteiras, no CPI de Zas. Non deixedes de probar o videoxogo serio desenvolto polo alumnado de tecnoloxía de Mondoñedo, para concienciar sobre o acoso. Ademais, organizamos un ciberfaladoiro sobre As multinacionais deseñando a FP. Naturgy e o módulo de sustentabilidade, onde coñecemos a publicación do mesmo nome dun dos compañeiros do grupo de traballo (ten versión en galego e castelán)

    Dentro do programa ESF-Pro, con entidades profesionais da enxeñería e a economía social, participamos no encontro de FORESGAL, noutro sobre Auditoría Social con REAS Galicia, e tamén nun encontro de reflexión sobre participación cidadá na implementación de infraestruturas de transporte de electricidade, coa REde Renovables. Velaquí unha cŕonica.

    No programa de ESF na Universidade participamos no encontro e feira de asociacións dos 10 anos de Aprendizaxe-Servizo na Universidade da Coruña.

    Os Bancos de REciclaxe Electrónica tamén estiveron moi ocupados, con repair café en Covelo, outro na Domus da Coruña, un faladoiro sobre tecnoloxías para o ben común e un obradoiro de cacharreo na AtlanticaConf, un Repair Café e Chocolatada Solar en Ourense en colaboración con outras entidades e outro no CS Revolta de Vigo.

    Dentro do Programa de Voluntariado Internacional de Coñecemento doutras Realidades, fixéronse as últimas formacións (unha presencial e outra en liña) sobre proxectos de cooperación e tamén sobre os propios proxectos en Honduras e quen participa neles. Agora mesmo xa están en Honduras Aída e Lorenzo, á espera de que, a mediados de xullo, se lles una Belén.

    O 23 de xuño, Día Internacional da Muller na Enxeñaría, compartimos reflexións da varias mulleres da nosa base social sobre vivencias persoais e o papel das mulleres neste eido.

    Como parte do traballo en rede, houbo participación de ESF na Presentación do libro Nova Cultura da Terra, e tamén entramos a formar parte da asociación promotora da revista Soberanía Alimentaria, Biodiversidad y Culturas.

HONDURAS

    En Honduras, dentro do eixo de soberanía alimentaria, coa nosa socia CODDEFFAGOLF, houbo unha xornada de formación sobre boas prácticas pesqueiras. Tamén unha de motivación empresarial, coa participación de 50 mulleres de diversos grupos. Dentro do programa de REstauración de Lagoas de Inverno (financiado por AECID e Xunta de Galicia), tivemos xira de intercambio de experiencias. Tamén continuou a Escuela de Habilidades para la Vida.

    No eixo de Dereito á Auga, coa Mancomunidade NASMAR, houbo unha formación en toma de mostras de auga para análise de calidade, e xa se tomaron varias para fortalecer o sistema de monitoreo, que logo se analizarán no laboratorio da Región Sur, que se creou dentro deste mesmo eixo de traballo.

MOZAMBIQUE

    Ademais de continuar o traballo de asesoramento técnico coas Administracións Rexionais da Auga do país, en xuño houbo un par de eventos relevantes dentro do programa AquaMoz de fortalecemento de capacidades en xestión de eventos hídricos extremos (secas e inundacións). 

    Un dos socios do proxecto, Augas de Galicia, participou en Sevilla a través do seu director no Encontro sobre irmandades entre operadores de auga, falando do exemplo que supón de cooperación técnica entre administracións públicas a  nivel organismos de cunca hidrográfica. Tamén ESF Galicia puidemos asistir en liña a actividade e deixámosvos unha crónica, e outra das nosas compas de ESF Catalunya que puideron estar en Sevilla.

    Ademais, tivemos de xira técnica en Galicia a Francisco e Moisés, técnicos da Administración Rexional da Auga do Centro. Aquí podes coñecer como lles foi (tamén tiveron encontros coa nosa base social).

    Lembra que, se queres ter unha visión xeral do que se fai no programa AquaMoz, aquí tes unhas infografías e un pequeno vídeo moi clarificadores.

ENLACES DE INTERESE

Activismo e persoas

Auga

Consumo responsable

Cooperación e ONGD

Educación para o desenvolvemento

Enerxía e cambio climático

Iniciativas

Investigación para o desenvolvemento 

Mundo

Pobreza e exclusión

Políticas e modelos de desenvolvemento

Soberanía alimentaria e defensa do territorio

Tecnoloxías da Información e Comunicacións (TIC)

Tecnoloxía para a transición ecosocial

RECOMENDACIÓN ARTÍSTICA

    Este mes queremos chamar a atención sobre El Salvador, neste caso a través do activismo cultural e o hiphop de denuncia de rapeiras como Yezli Mic. Aquí se lle pode ver con outras compañeiras coa canción ¿Quien nos va a parar?

E NO PRÓXIMO MES …

    Temos un novo apartado na nosa páxina web, onde se pode ver a axenda de próximos eventos ESFeiros ou que nos parecen interesantes pola temática. Ademais:

  • 5 de xullo (primeiro sábado de xullo): Día Internacional das Cooperativas
  • 7 de xullo: Día da Conservación do Solo
  • 7 de xullo: Repair Café dentro da Escola Popular de Verao da Asociación Gentalha do Pichel no seu local da rúa Santa Clara 21, Santiago de Compostela.  Colaborando co Banco de Reciclaxe Electrónica Municipal de Teo.
  • 7 a 11 de xullo: Escola de Verán de Ferramentas Libres. Escola de Camiños, Campus de Elviña. A Coruña. Son varios obradoiros de distintas ferramentas. Inscríbete de balde aos que queras! +INFO
  • Domingo 13 de xullo. Picnic Veraniego ESFeiro. Encontro informal da base social na Praia Fluvial da Tarroeira (OpenStreetMap | Google Maps) en O Pino. Trae a túa comida, ou se non vén pasar un rato pola mañá ou pola tarde!
  • 15 de xullo: Día Internacional das Tecnoloxías Apropiadas
  • Xoves 24 de xullo. 18-20h. Obradoiro de Escritura Creativa “Decrecendo a Tecnoloxía”. Dende a mañá estaremos de picnic pola zona. Lugar: Merendeiro con praia fluvial → Área recreativa Os Pasos, Aiazo (Frades). Inscríbete de balde neste formulario
  • 26 de xullo: Día do manglar
  • 28 de xullo: Día Internacional da Conservación da Natureza
  • Mércores 30 de xullo sobre as 18:30 una xira coñecendo o entorno da Mina Touro-O Pino (escrebe a sergio.fernandez[arroba]isf.es para anotarte)

   Para máis info sobre cursos e eventos en Galicia  consulta a Axenda Solidaria e as formacións da Coordinadora Galega de ONGD

A ESF-RASE DO MES

    A ética do coidado promove a substitución da escola actual, cargada dunha pesada ética liberal que educa os nenos e nenas na crenza do individuo como ser autónomo, a unha ética da persoa como ser necesitado e  dedicado á axuda mutua; un cambio de paradigma do individualismo e a despersonalización á interacción e o coidado.

GARCÍA MARÍN, Jorge, 2021. Curso de Novas masculinidades. En: UNIDADE DE IGUALDADE e VICERREITORÍA DE ORDENACIÓN ACADÉMICA E PROFESORADO. Itinerario de xénero III. Universidade de Vigo. 978-84-
8158-844-6.